༄༅། །བདེ་མོ་གྱིས།

 
ད་ང་བུད་སོང་ང་བདེ་མོ་གྱིས།
སེམས་སྡུག་མི་དགོས་ང་སླར་ཡང་གནས་འདིར་སྐྱེ་སྲིད།
རྒྱུ་མཚན་ངས་སྐྱེ་བ་སྔ་ཕྱི་ཁས་ལེན་པས་ཡིན།
དེ་བས་ང་སླར་ཡང་གནས་འདིར་སྐྱེས་འོང་།
ཨ་མའི་བུ་ལ་སྐད་ངག་ཡོད་ན།
སྙན་མོའི་ངག་ལ་བདག་པོ་མེད།
ཆུང་དུས་ངས་ཁྱོད་ཚོའི་སྙན་དབང་གསོས་མྱོང་།
རྒས་དུས་ཀྱང་ངས་ཁྱོད་ཚོར་རོལ་མོ་དཀྲོལ་མྱོང་།
བོད་སྐད་རྣལ་མ་གོ་མཁན་ཞིག་ཡིན་ན།
ངའི་རམ་དཀྲོལ་མ་གོ་ཟེར་བ་ཡོད་དམ།
ངས་ང་ནམ་ཡང་ཕྱུག་པོ་ཞིག་ཡིན་འདོད་ཡོད།
རྒྱུ་མཚན་ནི་ང་ལ་མངའ་རིས་ཀྱི་པི་ཝང་ཞིག་ཡོད།
དབྱངས་ཅན་མའི་ཕྱག་ནའང་པི་ཝང་ཙམ་ལས་ཅི་ཞིག་ཡོད།
ངས་ཆང་མང་ཙམ་འཐུང་བས་ལན་སོང་མི་གསུང་རོགས།
ང་ཅི་ཙམ་བསྡད་ཀྱང་འདི་ཙམ་ལས་མི་འོང་།
རྒྱུ་མཚན་ནི་ངའི་སྐད་ལའང་རྒས་རྒྱུ་ཡོད།
ད་ནས་བཟུང་ང་དྲན་དུས་ངའི་རྡུང་ལེན་ལ་ཉོན།
སེམས་སྐྱོ་དུས་ངའི་རྡུང་ལེན་ལ་ཉོན།
དབྱར་ཐོན་དུས་ནགས་རྫོང་ལ་ཉོན་དང་།
ཁུ་བྱུག་སྟོང་སྟོང་གྲག་པ་དེ་ངའི་སྐད་ཀྱི་སྤྲུལ་བ་ཡིན།
ད་ང་བུད་སོང་ང་ངའི་སྐད་མ་ཤི་ན་ང་ཤི་མེད།
ང་ནམ་ཡང་ཁྱོད་ཚོ་དང་ལྷན་དུ་ཡོད།
ངའི་པི་ཝང་དེ་ད་ནས་བཟུང་ཁྱོད་ཚོར་སྤྲད་པ་ཡིན།
བདག་པོ་ནི་ཁྱོད་ཚོ་རང་ཡིན་པས་སེམས་ལ་ཟུངས།
མགར་རྒད་པོའམ་གང་བུ། རྩེ་ཁོག
 

Leave a Reply